اسعدتنا بقدومك الجميل
وكلماتك الشيقه
وهي كدا صراعات الحياه بين ادم وحواء
ولكن هنا مابين اخ واخت بيناقشوا الموضوع بطريقتهم الكوميديه طبعا
اسعدنا تشريفك يا استاذ محمد ابو العبادي

مش عارفه ليه الراجل منكم دايما باصص بره
لو كان معاه ملكة جمال برضه عيته تزوغ بره
فى مره يا ولاد الحلال قلت افرحه شويه
غيرت لون شعرى وركبت للعيون عدسات
وعملت ميكب والطقم الجديد ياااهوو
وهو ملقوح عالقهوه زى ما كان معتاد
مشيت قدامه فى الشارع ومهديه الخطوات
لقيت عينيه هتطلع والسحنه مفروده
والبسمه على الشفايف من هنا للجيزه
وقال يا حلو هدى حرقت لى قليبى
يا اما نفسى تعطف وتسمح وتكون انت نصيبى
اوقف يا جميل هقول لك عالكلام المفيد
رايدك وطلبت ايدك وادفع مهور الوفات
بالذمة يا ناس قولولى الحق من غير مجاملات

لو فعلا في يوم كنت شفتك حلوه

عمر عيني ما تشوف غيرك لاجوه ولابره

ادلعك وعن الحب في قلبي انا احكيلك

يمكن تحسي وتخلي عندك دم حتي لو مره

ودن من طين وودن من عجين وماسكه منديلك

دموعك وقت طلباتك دموع تمساح

لو شفتيني مرة جاي للبيت وانا مرتاح

وليكي عندي طلب وفيه مصلحتك تفتحي الباب قبل ما اطلع المفتاح

تقولي جيت خلاص عندي يانور عيني وقلبي ارتاح

افرح انا وياكي واشعر بالحب وقلبي يكون مرتاح

تاخدي طلباتك وتخلص معايا مصلحتك تقولي يوم ماشفتك ماطلعله صباح

هي كدا الحريم اعتاب واحده تسعدك وواحده توريك العذاب علي الباب

ياما انت ظالم يالليل وورتني العذاب الوان ونفسي ارتاح انا مرة


يوم ما ربنا يخلصني كدا منك انا هكسر وراكي مش قله والله ليكونو 100 جره

شايفين ...شاهدين ...ناكر الجمايل والمعروف
فى العيشه دايما مفرط ومتهمهوش العشره
فيه واحده ست يا اخوانا تحب الخناقات
تحب تعيش فى مشاكل من غير اسباب
البيه عايزنى بصراحه اصرف عالبيت
ارجع من شغلى على المطبخ وكمان ترتيب
وشهريار راجع بدرى ونافش لى الريش
ومية تلكيكه فى تلكيكه قرف وخلاص

طبع الخبث والحيله لوحدكم يابنات حوا والله واخدينه

تكوني مطهقاه في عيشته ومبهدلاه ومطلعه عينه

يوم ما ياجي يفك عن نفسه او ينطق الغلبان كدا بكلمه

ويقول ياناس انا منها ياربي ومن افعالها خلاص تعبان

تلمي الجيران عليه وتقولي مظلومه ياخبيثه وتعكنني عليه وع اللي جايبينه

يا سيدى فهمنى بالراحه على المطلوب
مش ناقصه انا كتر وقاحه اعمل معروف
اشمعنى انت بتتودود مع صابر اخوك
تحكى له على كل حياتنا وبكل برود
وتشكى منى وتتشاكى ..كلامك مرفوض

لو كنت لقيتك في يوم هاديه ولكلامي كدا سامعه

مكنتش كلمت حد خالص ولا حد لعيوني شاف دمعه

اصل الادب يابنت الناس والله تلاقيه غالي

والحق علي الوالد سابك للوالده وفاكرها هتربي علي الغالي

وعاش حياته ونسي ان البنت زينتها في ادبها وتنتسب لبيت عالي

قالوها زمان لولا الادب مكانوش عملوا للعلوم جامعه

هى وصلت للدرجه دى يا اخرة صبرى
اسم الله يا اخويا على جنابك انت المتربى
انا اهلى ربونى لكن انا ليا حقوق
واللى مايشوفش عيوبك يتعمى دا اكيد
احكيلهم انا ولا تحكيلهم عا الواد محروس
فاكر مجايبك وعمايلك ..دايما مفقوس

الاصيله طول عمرها في جوزها ما بتغلط ولاتفرط

تصون السر وتحافظ عليه وفي عشرته عمرها ماتفرط

لانها بنت اصول وبنات الاصول في الربايه معروفه

لكن انتي بهدلتيني وكشفتي سري وامك وراكي مفهومه

نازله زن ودوي علي ودانك وكلامها الشر عليكي فيه بتقرط

شايل امى فوق راسك وزاعق ليه
امى بتنصحنى توجهنى يا سعادة البيه
انت اللى ضميرك بيناكف ناوى عالسو
فاكرها زى امك سوسه وبتنقط سم
والنبى للتلم وتخلى عند اهلك دم

يا اخى بعد الشر على امى وكل حبايبى
ملكش دعوه انت يا موكوس بقرايبى واهلى
فالح تتباهى وتتقنعر بالست الوالده
قادر يحمينى ويحرسنى من عينها البارده

منا لو مره كنت شفت الزينه من امك

كنت هدعيلها وعنها ادافع مهي امك

لكن طول عمرها ولسانها منها متبري

زي السوسه في الزرع تاكل والله ما تخلي

لكن بنت الاصول الكريمه المؤدبه امي

مرعياني وفي غيابي تلاقيها تشيل همي

وعند ست الحبايب انا بقولك اوعي تعيبي واتلمي

احسن اقل الادب وللكلام العفش اسمعك واوريكي

منتي بتدافعي عليها لاانها امك ومن دمك

لكن لو بعين الغرب تشوفيها والله يزيد همك

الهي تاخد لها تأبيده وانتي تجيلك مصيبه وتلمك

لا تجيب سيرة امى ولا اجيب انا سيرة امك
خلينا فى بيتنا وفى عيالنا وفى همى وهمك
البت تفيده الخدامه هتتجوز بكره
وانا عايله الهم ومش عارفه اسيبهم مع مين
ما تشور انت عليا والنبى يا حسين

الست الاصيله لبيتها وعيالها خدامه

مش عيب ولاحرام ومفيش عليها كدا ملامه

تخدمهم تراعيهم بحنانها تكبرهم تداديهم

تحفظ وعودها وواجبات بيتها وفروضه تؤديهم

انتي عاوزة تقوليها بالعربي ياشملول اقعد بيهم

انسي يا امي الفكره دي من راسك بالمره كدا واصل

لو فكرتي فيها تاني وحياة النبي لبيت ابوكي ومع الف سلامه

بالعقل احسبها يا سى السيد وهات ورقه وقلم
مين فينا اللى بيقبض اكتر والمصلحه تحكم
مش عيب انك تقعد بيهم وتحادى عليهم
والنبى يا الغالى لتعقلها وتقول اوكى

غلطان انا والله ودا ذنبي من الاول

اديتلك الفرصه وسكت من الاول

قلت خليها تعيش يومين وتشوف الحريه

تشتغل وتخرج ماهي خلاص ديمقراطيه

ومتغصبش عليها ياواد سيبها دي وليه

لكن اعمل انا ايه في بختي ونصيبي من الاول

ياريتني ماسكت وكسرت راسك لانه غلب وهيطول

خلاص احنا فيها اقعد لك فى البيت
ومالإبره للصاروخ الاقى طلباتى تقول جيت
ولا المرتب نقص ولا اجيب لك منين
شيل انت بقى ولا تتحسر فى وشى ولا تقولى ياريت

انا هقعد فى البيت سلطانة زمانى
وانا ايه يعنى اللى عالشغل كان رمانى
بالمناسبه عايزه اقول لك على حاجه يا حياتى
فيه شنطه حلوه جابتها نانا وصافيا وكل صحباتى
تمنها حراق شويه بس نفسى انا فيها وبحلم بيها ليلاتى

خلاص استبينا يا حياة قلبى
هات انت بس الفلوس والسكه اللى تودى
وانا اوعدك هحافظ لك على فلوسك
وان عزت حاجه قول لى وتعالى شوف ردى
مش هحرمك من فلوسك وهغرقك فى العز
جوزين شرابات فى الشتا وقميص اسبور فى الصيف
وطواقى وفانلات هتتكسى يا حسين

كلامك كما شهد حلو وبالسم اكيد مغزول

تقولي الكلمه بالراحه اشوف لسانك كدا معدول

لكن قلبك جواه نار قايده وماسكه نفسك مفيش فايده

عارفك لئيمه وتقضي مصلحنك وتقولي كلام ويزول

ياقلبي ما كنت فاضي وايه وقعك مع الناس دول

والله ماليكي امان يابخيله واطيه ورديه واطلعي من دول

نيتك سودا وسكتك عتمه ولا نافع فيك القول
وايش يعدل حالك المايل طبعك ردى على طول
يارب خلصنى منه لسانه على طول كده بيطول
لولا مربوطه بالعيال كان ليا فيك كلام تانى
اه يانى منك يا قلبى يا اما انت مسكين وحدانى


اهىء اهىء اهىء

طيب يانور عيني يابنت الناس الاكابر

ناخد شويه هدنه ونتصالح وعليكي انا صابر

لازم ياستي شويه من الروقان ونتعايش

ناخد قسط من الراحه ومفيش حد فينا خلاص هيكابر

ايوه كده اتعدل وجعت لى قلبى
لا تخبى عنى حاجه ولا انا راح اخبى
ونعيش حياتنا فى راحه والفه وسكينه
بس انت متروحش بعيد وخليك هنا جنبى

والله طول عمري بتمني اكون معاكي هادي

لااني شاريكي يا عمري وبنصيبي انا راضي

فرحت بيكي واتمنيتك وكملت فرحتي يوم كتابي

ربنا يبارك لي فيكي منتي نصي الحلو وام كمان لااولادي

العقل زينه وياما دايما قالولى
حطى زوجك فى عيونك هيجيب لك اللولى
هو يعنى انا اللى كنت غاويه خناق
بس انت اصلا خنقه وعليك الناس لامونى

بتجري شكلي ليه يابنت الناس تاني

منا قلت اجر ناعم والعيشه معاكي تهنالي

غاويه نكد ونقار ليه والله مش عارف

لكن غلطتي انا واستاهل ما جرالي

انا بهزر معاك خليك خفيف الدم
انا ما صدقت صفيت لى شويه ونسيبنا بقى من الهم
فكرتنى بصحيح كنت عايزه اقول لك حكايه
عايزين ميتين جينيه دخلت فى جمعية ويادوبها بقى تتلم

وديني ولا اعبرك طالما الصلح عندك كله مصالح

اصفالك انا وانسي واقول ياواد مفيش في الحياه مصالح

الاقي حضرتك بتصالحيني لمصلحتك وفلوس تلميها

غلطان انا من البدايه اني فكرتك ست تتعاشر وتتصالح

يا ابنى افهم متوجعليش قلبى
اللى انا بعمله ده لمصلحتك ومصلحتى
تلاقيلك قرشين ينفعوك فى وقت الضيق
ولادك داخلين مدارس ..هتقول لهم والله ما بيدى

ياستي خليكي في بيتك واتراعي لعيالك

انا مش عاوز فلوسك واتفرغي لعيالك

تعبتيني والله وكانت فكره من الاساس غلط

في واحده صاحبتك جالها شلل يارب عقبالك

بتدعى على عينى عينك من غير خشا ولا لوم
اصرخ والم الجيران مالقهر يا عيب الشوم
عيالك اشبع بيهم انا رايحه عند امى
ادعى عليك بايه طيب يارب عينك ماتشوف النوم

يابنت الناس ما تهدي وتعالي ناخد هدنه

بلاش النكد ليلاتي خلينا نعرف كلنا حدودنا

قالوها اهل زمان بأماره ورددوها كمان جدودنا

الراجل الهادي بيته عمران وانتي ليه غاويه اللطم علي خدودنا

انا برضه اللى غاويه نكد وخناق
فى طباعك دى اقول سبحان الخلاق
اقول لك على حاجه تريحنا احنا الاتنين
تعالى نعمل معاهده ونمضى عقد اتفاق

قلقان والله من كلامك دا ومش مرتاح

بس هوهم نفسي واصدق واقبل الاصلاح

علشان انا ابن ناس وعلي العز متربي

هصبر عليكي انا والامر خلاص لله

قادر يصلح حالك وزي الليل يمكن ياجي عليكي صباح

خلاص نعمل معاهده وفيها بنود الاتفاق
الراجل فى بيته راجل وجب عليه الانفاق
متزعلش منى والخلق منك يضيق
والكرم شيمة الاكابر اوعى تخاف مالإملاق

هتعملي فيها مثقفه وفيلسوفه

خيبتك ظاهرة للجميع ومكشوفه

كلامك كتير والله وفعل مفيش

ونفسي الاقيها معاكي علي طول مكسوفه

يجر شكلى وينكش عالخراب ويشتكى
اقول له نعدل المايل خلى الحياه تصفى
يلف ويدور لما اجيب سيرة الفلوس ويشت
يارب لمض عقلك تخرب كده وتنطفى

يابنت الناس والله انا عاوز اكون هادي

وفي البيت تكوني ضاحكه وصافيه لي

بدال العكننه اللي انتي واخداها وراثه

ما تاجي نصفي بجد ونرجع لحبنا الماضي

كلامى واضح مش عايزه الف وادور
ركز معايا انا طالبه تكون معايا وعليا شور
البيت والمسؤليات والعيال احمال تهد الحيل
وانت عايز عيشه حلوه من غير كلفه وبتحور فى الامور

متاجي يابت الناس نصفي ونتصالح

انا ماليش غيرك في الدنيا ومسامح

وجودك معايا ف الدنيا بيسندني و بيكفيني

وان كنتي غلطتي في حقي خلاص والله انا مسامح

اصالحك وماله على رأى الست لطيفه
ما دام عيشتنا حلوه واكلتنا نضيفه
ربنا يخليك ليا يا جوزى وابو عيالى
ما تيجى كده نخرج نتمشى ونسهر سهره ظريفه

طلباتك اوامر يانور عيني

اخرجك وافسحك بس هاوديني

انا في الدنيا ماليش غيرك

ولا حد غيرك ابدا هتشوفه عيني

الله على كلامك يا ابو مروان
كان فين دا كله واحشنى من زمان
عشر دقايق اكون جاهزه يا عيونى
نتعشى قول لى فى اى مكان؟؟؟

كلامي الحلو مش كلام دا احساس

نابع من قلبي ويملي 200 كراس

انتي عندي والله من الدهب اغلي

حافظي علي حبي وانا احفظك يابنت الناس

ايه الحكايه يا اغلي الناس يا مراتي


شغلوكي العيال وبعدوكي عني ياحياتي


ياترا نسيتي مودتي الحلوه ومصاريفي

ولاجيوبي الفاضيه دي السبب فيها الست حماتي

يا مساء الخناق وجر الشكل الوان
مكنت بعقلك جرى لك ايه يا قمر الزمان
مال امى بفلوسك تلزمها فى ايه
انا قاعده قدامك اهو ولا عمرى فارقت المكان

انتي للمكان ورده حياتي وف الاساس تزينيه

تنوري الدنيا عليا وزيك يام العيال فين الاقيه

اصيله وجدعه ومعايا علي البلا صابره

بس ياريتك تخفي الطلبات عليا واللي خدتيه تجيبيه

اسمع كلامك اصدقك اشوف امورك استعجب
منين اجيب اللى خدته واللى راح بيرجع يا مهبب
بقول لك ايه كلامك الحلو مالآخر كده مش مريحنى
قل لى فيك ايه دوغرى كده يا حلو ولودانى ياللا اطرب

ياستي والله ما فيه طلبات
انا عاوز حياتنا تكون هاديه
عاوزها تمر بدون خلافات
وتكوني عليا يا حبيبتي راضيه

الرضا من الله يا قدرى
انا راضيه وحامده وشاكره
انا بس اتطسيت فى نظرى
جرى ايه يا سبعى يا جملى

ياه علي الحب وسنينه ياعمري

تقولي فيا الشعر ولا هو دا قدري

كلامك زي السم بيقتل فيا المشاعر

كان يوم مهبب لما اتسيط انا في نظري

السم دا شربناه مالعشرة الهباب
كنت فاكره نفسى فى جنه طلعت فى سراب
يا ما نفسى اخرجك بره وارد عليك الباب
مبقيش فيه مجال لخناق ولا وجود لعتاب

خلاص طالما تعبتي وللامور هتهدي

لازم اعمل بأصلي ومعاكي انا اعدي

قسمتي ونصيبي واعمل ايه بس ياربي

ام العيال ومعايا في الهموم شايله ولعيالي بتربي

هكمل معاكي صفحه جديده وادعيلك بالهدي ربي